(الشمس غابت)مرثية والدي,رحمه الله

منذُ مايقارب أربع سنوات … أهدتني رفيقة دربي .. وصديقة العمر
أبيات رثت فيها الشاعره القديرة \ عيون المها .. والدي .-رحمه الله-
كانت تعلم بإحساسي تجاه والدي -غفر الله له وأسكنة فسيح الجنان-
فأهدتني هذه القصيدة .. والتي عاهدتها أن تكون رمزاً أفخر به .. وأن ترافقني حيث ما كنت
وها أنا اليوم أفردها بصفحة تخصها دون غيرها ..
لمحبة صاحبة الإهداء .. ولمحبة والدي رحمه الله تعالى ..

===============

((الشمس غابت))

الشمس غابت وانتهت كلمة الطيب
ما عاد له معنى ولا له سبايب

مات الذي بالطيب عدى المراقيب
واللي بكت فرقاه سبع العجايب

الشمس غابت وتخرع بالخلا الذيب
يوم اظلمت شمس السخا والوهايب

واليوم يوم اقفى خوي المواجيب
اقفى على شداد الكرم والركايب

اقفى خليٍِ من صغار العذاريب
له سيرةٍ من ذكرها ما تعايب

ابوي بسنين الوزاء للمعازيب
يهل خيره مثل وبل السحايب

وابوي يوم الارمله له نواديب
وقف لها مثل الذرى عن هبايب

وام اليتامى يومها شقت الجيب
ظلل عليها من كبار المصايب

ذرّى بذراه اللي دموعه مساكيب
على العجوز وكل شايب وعايب

ليا شاف من يشكي جروح معاطيب
مانام إلا وجرح من صاح طايب

راعي العلوم الغانمة ورأيه مصيب
حــــلال قالاتٍ يفك النشـايب

اقفى على علم كما ريحة الطيب
يفوح طيبه لوهو اليوم غايب

وأقفى وخلاّنا نجر النواحيب
كبيرنا وصغيرنا له نحايب

يالله طلبتك يوم مد المكاتيب
ابوي باليمنى يمد الكتايب

يالله عسى يسقي ألذ المشاريب
في جنتك يا عل مثواه طايب

يا عل ما يعرض على أدنى اللواهيب
وعلى عظامه ما تمر اللهايب

يا رب يا رحمن يا عالم الغيب
تجعل له بقبره رياضٍ رحايب

الشمس غابت وانحنت كلمة الطيب
ما دام راعيها ونيس النصايب

غاليتي \\مرومه..
ألف مليون شكر … يا عطرة الخلق ..
ونقية القلب .. فخورة بكِ ياغالية وبإهدائك الرائع ..
ألف شكر مرومتي ..لا حرمني الله صحبتك وطيب أخوتك الجميلة ..
دمتِ بنقائك يا نقية ..

أختكـ
بدرية ..